TORNA A SURRIENTO (1902)

 

Vire 'o mare quant'è bello,

spira tanto sentimento,

comme tu, a chi tiene mente,

ca scetato 'o faje sunná.

 

Guarda quá' chisti ciardine,

siente sié' sti sciure 'arancio,

nu prufumo accussí fino

dint''o core se ne va.

 

E tu dici: "Parto, addio!"

T'alluntane da stu core.

Da la terra de ll'ammore,

tiene 'o core 'e nun turná?

 

Ma nun mme lassá,

nun darme stu turmiento.

Torna a Surriento!

Famme campá!

 

Vire 'o mare de Surriento

che tesoro tene 'nfunno.

Chi ha girato tutt''o munno,

nun ll'ha visto comm'a ccá!

 

Guarda attuorno a sti Ssirene,

ca te guardano 'ncantate

e te vònno tantu bene.

Te vulessero vasá.

 

E tu dici: "Parto, addio!"

T'alluntane da stu core.

Da la terra de ll'ammore,

tiene 'o core 'e nun turná?

 

Ma nun mme lassá,

nun darme stu turmiento.

Torna a Surriento!

Famme campá!

VOCE 'E NOTTE (1904)

 

Voce 'e notte te sceta 'int'a nuttata,

sta voce è a mia, sta voce è a mia.

Si 'sta voce te scéta 'int''a nuttata, 

mentre t'astrigne 'o sposo tujo vicino,

statte scetata, si vuó' stá scetata, 

ma fa' vedé ca duorme a suonno chino.

 

Nun ghí vicino ê llastre pe' fá 'a spia, 

pecché nun puo' sbagliá, 'sta voce e' 'a mia,

e' 'a stessa voce 'e quanno tutt'e duje, 

scurnuse, nce parlávamo cu 'o "vvuje". 

 

Si 'sta voce te canta dint''o core 

chello ch'i' nun te cerco e nun te dico,

tutt''o turmiento 'e nu luntano ammore, 

tutto ll'ammore 'e nu turmiento antico.

 

Si te vène na smania 'e vulé bene,

na smania 'e vase córrere p''e vvéne, 

nu fuoco ca te brucia comm'a che,

vásate a chillo. Che te 'mporta 'e me!

 

Si 'sta voce che chiagne 'int''a nuttata

te sceta 'o sposo, nun avé paura,

vide ch'è senza nomme 'a serenata,

dille ca dorme e ca se rassicura.

 

Dille accussí: "Chi canta 'int'a 'sta via 

o sarrá pazzo o more 'e gelusia! 

Starrá chiagnenno qualche 'nfamitá.

Canta isso, sulo. Ma che canta a fá?!" 

 

Voce 'e notte te sceta 'int'a nuttata,

oh, ohè, oh ohèee!

MANDOLINATA A NAPOLI (1913)

 

Sera d'está! Pusilleco lucente

canta canzone e addora d'erba 'e mare.

Voglio 'e pparole cchiù d'ammore ardente,

voglio 'e pparole cchiù gentile e care

pe' dí "Te voglio bene" a chi mme sente.

 

Ma d''e pparole cchiù carnale e doce,

ne sceglio sulo tre: "Te voglio bene".

Bella, 'int''o core tujo sacc'io chi tiene,

chi sta int''o core mio saje pure tu.

 

P''o mare 'e Napule quant'armunia!

Saglie 'ncielo e 'ncielo sentono,

tutt''e stelle, 'a voce mia.

Voce, ca tènnera,

st'ammore fa.

 

Notte d'está! Se só' addurmute 'e ccase

e 'o cielo, a mare nu scenario ha stiso.

Staje 'mbracci'a me, 'nnucente só' sti vase.

Bella, stanotte, te só' frato e sposo.

Stanotte, Ammore e Dio sóngo una cosa.

 

Canta, e da 'o suonno Napule se sceta,

ridono 'e vvocche ca se só' vasate.

Tutt''e suspire 'e tutt''e 'nnammurate

suspirano, stanotte, attuorno a te.

 

P''o mare 'e Napule quant'armunia.

Saglie 'ncielo e, 'ncielo, sentono,

tutt''e stelle, 'a voce mia.

Voce, ca tènnera,

st'ammore fa.

TU CA NUN CHIAGNE (1915)

 

Comm'è bella 'a muntagna stanotte,

bella accussí, nun ll'aggio vista maje!

N'ánema pare, rassignata e stanca,

sott''a cuperta 'e chesta luna janca.

Tu ca nun chiagne e chiágnere mme faje,

tu, stanotte, addó' staje?

Voglio a te!

Voglio a te!

Chist'uocchie te vonno,

n'ata vota, vedé!

Comm'è calma 'a muntagna stanotte,

cchiù calma 'e mo, nun ll'aggio vista maje!

E tutto dorme, tutto dorme o more,

e i' sulo veglio, pecché veglia Ammore.

Tu ca nun chiagne e chiágnere mme faje,

tu, stanotte, addó' staje?

Voglio a te!

Voglio a te!

Chist'uocchie te vonno,

n'ata vota, vedé!

CANZONE APPASSIUNATA (E.A.Mario 1922)

 

'N'albero piccerillo aggiu piantato,

criscènnolo cu pena e cu sudore.

'Na ventecata giá mme ll'ha spezzato

e tutt' 'e ffronne cágnano culore.

Cadute so' giá 'e frutte e tuttuquante,

erano doce, e se so' fatte amare.

Ma 'o core dice: "Oje giuvinotto amante,

'e ccose amare, tiénele cchiù care".

E amara comme sî, te voglio bene.

Te voglio bene e tu mme faje murí.

 

Era comm'ô canario 'nnammurato,

stu core che cantaje matina e sera.

"Scétate" io dico e nun vo' stá scetato.

E mo, nun canta manco 'a primmavera.

Chi voglio bene nun mme fa felice,

forse sta 'ncielo destinato e scritto.

Ma i' penzo ca 'nu ditto antico dice:

"Nun se cummanna a 'o core". E i' mme sto' zitto.

E mme sto' zitto, sí, te voglio bene.

Te voglio bene e tu mme faje murí.

 

Chiagno p'ammore, e cade 'o chianto mio

dint'a 'sta testa: 'o chianto 'a sta arracquanno.

Schiòppa 'na bella rosa e i', pe gulio,

a chi mm'ha fatto chiagnere nce 'a manno.

Lle dico: "Rosa mia tu mme perduone

si te scarpesarrá senza cuscienza".

Ce sta 'nu ditto ca mme dá ragione:

"Fa' bene e scorda e si faje male penza".

Pènzace buono sí, te voglio bene.

Te voglio bene e tu mme faje murí.

Comme facette màmmeta (1906)

 

Quanno mammeta t'ha fatta,

quanno mammeta t'ha fatta.

Vuó sapé comme facette?

Vuó sapé comme facette?

 

Pe 'mpastá sti ccarne belle,

pe 'mpastá sti ccarne belle.

Tutto chello ca mettette?

Tutto chello ca mettette?

 

Ciento rose 'ncappucciate,

dint'â mártula mmescate.

Latte, rose, rose e latte,

te facette 'ncopp'ô fatto.

 

Nun c'è bisogno 'a zingara

p'andiviná, Cuncè.

Comme t'ha fatto mammeta,

'o ssaccio meglio 'e te.

 

E pe fá 'sta vocca bella,

e pe fá 'sta vocca bella.

Nun servette 'a stessa dose,

nun servette 'a stessa dose.

 

Vuó sapé che nce mettette?

Vuó sapé che nce mettette?

Mo te dico tutte cosa,

mo te dico tutte cosa.

 

'Nu panaro chino, chino,

tutt' 'e fravule 'e ciardino.

Mèle, zuccaro e cannella,

te 'mpastaje 'sta vocca bella.

 

Nun c'è bisogno 'a zingara

p'andiviná, Cuncè.

Comme t'ha fatto mammeta,

'o ssaccio meglio 'e te.

 

E pe fá sti ttrezze d'oro,

e pe fá sti ttrezze d'oro.

Mamma toja s'appezzentette,

mamma toja s'appezzentette.

 

Bella mia, tu qua' muneta?

Bella mia, tu qua' muneta?

Vuó sapé che nce servette?

Vuó sapé che nce servette?

 

'Na miniera sana sana,

tutta fatta a filagrana,

nce vulette pe sti ttrezze,

che, a vasá, nun ce sta prezzo.

 

Nun c'è bisogno 'a zingara,

p'andiviná, Cuncè'.

Comme t'ha fatto mammeta,

'o ssaccio meglio 'e te.